Vel heppnað starfstengt ísenskunám á Krílakoti
Frá október á síðasta ári hafa SÍMEY, Dalvíkurbyggð og leikskólinn Krílakot á Dalvík boðið upp á starfstengt námskeið í íslensku fyrir fjóra starfsmenn Krílakots sem eru af erlendum uppruna. Öll kennslan fer fram á starfstíma leikskólans og er þátttakendum að kostnaðarlausu.
Eftir stöðupróf í íslensku sl. vor fyrir starfsmenn Krílakots af erlendum uppruna var ákveðið að bjóða fjórum þeirra upp á starfstengt íslenskunám þar sem lögð yrði áhersla á þjálfun talmáls og hagnýts orðaforða út frá daglegu starfi á leikskólanum.
Dagbjört Ásgeirsdóttir, sem er menntaður leikskólakennari og hefur mikla reynslu af kennslu á íslenskunámskeiðum í SÍMEY, hefur séð um kennsluna og haldið utan um íslenskunámið á Krílakoti. Fyrir áramót kenndi hún námskeið sem hún skilgreinir sem íslensku 3, og núna á vorönn er framhaldsnámskeiðið íslenska 4.
Starfsmennirnir fjórir eru frá jafnmörgum löndum; Perú, Póllandi, Filipseyjum og Spáni. Þrír þeirra búa á Dalvík en einn á Akureyri.
„Kennslan fer fram í húsnæði Krílakots. Þar er ljómandi fín fundaraðstaða með skjá sem ég nýti í kennslunni. Íslenskunámið er miðað út frá þörfum þessara fjögurra einstaklinga, þ.e.a.s. hvað þeir eru að takast á við í sínum daglegu störfum á Krílakoti; samskipti við börnin, foreldra þeirra og aðra starfsmenn á leikskólanum. Það sem ég legg mesta áherslu á er talmálið því reynslan er sú að það þarf fyrst og fremst að hjálpa fólki af erlendum uppruna að komast yfir þann þröskuld að þora að tjá sig á íslensku, í tilfelli starfsmannanna á Krílakoti að spjalla við krakkana, foreldrana eða samstarfsfólkið, t.d. á kaffistofunni. Stóra málið er að komast yfir óttann við að tala og eiga á hættu að segja eitthvað vitlaust eða bera eitthvað rangt fram. Með tungumálinu opnast fólki svo margar dyr að samfélaginu og með samfélaginu kemur tungumálið – þetta helst allt í hendur. Það sem mér finnst mikilvægast og til mikillar fyrirmyndar af hálfu Krílakots og Dalvíkurbyggðar er að geta boðið upp á þessa kennslu á vinnutíma. Þá er fólk óþreytt og meðtekur hlutina betur. Fyrir starfsfólk í fullri vinnu er allt annað og betra að geta sótt íslenskunámið í vinnutímanum en að sækja námskeið eftir langan vinnudag, seinnipart dags og fram á kvöld. Frá því að við hófum fyrra námskeiðið sl. haust finnst mér hafa orðið mjög jákvæðar breytingar, fólkið er öruggara með sig og opnara að tjá sig á íslensku. Hvernig sem á það er litið er einn af mikilvægustu þáttum í aukinni virkni fólks af erlendum uppruna í samfélaginu aukin þekking og notkun tungumálsins,“ segir Dagbjört.
Ágústa Kristín Bjarnadóttir, leikskólastjóri Krílakots, sem er fimm deilda leikskóli á Dalvík með ríflega hundrað börn, segir að reynslan af þessu fyrirkomulagi á íslenskunámi fyrir erlenda starfsmenn leikskólans sé mjög jákvæð. Lykilatriði sé að frá upphafi hafi Dalvíkurbyggð stutt dyggilega við bakið á leikskólanum til að geta boðið starfsmönnunum fjórum upp á námið á vinnutíma.
Íslenskunámskeiðið fyrir áramót var 40 klukkustundir og námskeiðið núna á vorönn, sem lýkur í maí nk., er sömuleiðis 40 klukkustundir. Kennt er tvisvar í viku, á mánudags- og miðvikudagsmorgnum frá kl. 8 til 9:30.
Ágústa segist sannfærð um að þessi leið í íslenskunámi, að fella það inn í dagvinnutímann, sé sú rétta og umræddir starfsmenn hafi lýst ánægju með þetta fyrirkomulag. Hún segir að nú þegar hafi komið í ljós umtalsverður árangur af náminu, smám saman hafi byggst upp aukið sjálfstraust hjá starfsmönnunum til þess að tala íslensku í auknum mæli við börnin, foreldra þeirra og samstarfsfólkið. „Það er nákvæmlega það sem við vonuðumst til að út úr þessu verkefni kæmi og því erum við mjög ánægð með árangurinn,“ segir Ágústa.