Mikilvægt verkefni fyrir kennslu í íslensku fyrir arabískumælandi
Undanfarin tvö ár hefur SÍMEY unnið að verkefni sem ber yfirskriftina Íslenska fyrir arabískumælandi og hafði að markmiði að búa til námsefni í íslensku sem öðru máli fyrir fólk sem hefur arabísku að móðurmáli, er ólæst á latneskt stafróf og hefur lítinn menntunarlegan bakgrunn. Við þessa vinnu var stuðst við hæfniviðmið Evrópska tungumálarammans eða þann viðauka sem bættist við hann árið 2016 og lýtur að ólæsum einstaklingum. Verkefnið hlaut styrk að upphæð 3,9 milljónir króna úr Fræðslusjóði framhaldsfræðslu. Lokaskýrsla um verkefnið liggur fyrir.
Þetta verkefni var framhald fyrra verkefnis sem Ahmed Essabiani vann og fólst í að útbúa námsefni í íslensku sem öðru máli. Í kjölfar þess vaknaði áhugi á að þróa stoðefnið frekar og ganga lengra í að mæta sérþörfum þessa hóps. Ahmed hélt áfram með verkefnið og nú liggur fyrir ítarlegt og vandað námsefni sem nýtist bæði kennurum og nemendum í íslensku sem öðru máli, með hliðsjón af þörfum arabískumælandi einstaklinga.
Ahmed Essabiani hefur búið og starfað á Íslandi í ríflega tuttugu ár. Árið 1988 flutti hann átján ára gamall frá Marokkó, þar sem hann fæddist og ólst upp, til Frakklands og var í eitt ár í háskóla. Lærði síðan viðskiptafræði á Ítalíu og vann þar í framhaldinu. Á Ítalíu bjó Ahmed í ellefu ár. Hann bjó líka um tíma í Þýskalandi og Bandaríkjunum. Til Íslands kom hann fyrst árið 1999 en hefur búið hér frá 2002, á Akureyri frá 2009. Hann starfaði m.a. í Becromal í fjögur ár en árið 2016 lagði hann sitt af mörkum við móttöku flóttamanna frá Sýrlandi til Akureyrar, enda talar hann arabísku. Ahmed hefur mikla reynslu af kennslu í íslensku, bæði hjá SÍMEY og Mími í Reykjavík. Þá starfar hann sem samfélagstúlkur og hefur setið réttindanámskeið og kennt samfélagsfræðslu fyrir innflytjendur á Íslandi.
Sem fyrr segir er nú aðgengilegt fjölbreytt námsefni í íslensku sem öðru máli fyrir fólk sem hefur arabísku að móðurmáli. Meðal annars hefur Ahmed tekið saman nákvæmt yfirlit um íslenska stafrófið með útskýringum á framburði, rithætti og notkun. Einnig er farið yfir meginþætti íslenskrar málfræði.
Ahmed Essabiani segir að sl. vetur hafi þetta námsefni verið prófað í íslenskukennslunni í SÍMEY og það hafi gefið mjög góða raun, efnið hafi gagnast mjög vel og nemendur lýst ánægju með það.
„Ég hef nú þegar notað hluta af þessu námsefni í bæði tal- og ritmáli og í næstu viku mun ég nota það á námskeiðinu Íslenskuþjálfarinn í SÍMEY. Auk þess að nota þetta efni í kennslunni í SÍMEY hef ég gefið fullt leyfi til þess að þetta verði notað annars staðar í íslenskukennslu,“ segir Ahmed.
„Á ýmsan hátt eru hliðstæður í íslensku og arabísku, t.d. hvað varðar málfræðina, og það hefur verið áhugavert að bera þessi tvö tungumál saman. Þetta hefur hjálpað fólki sem hefur arabísku að móðurmáli að læra íslensku. Vissulega er bæði tal- og ritmál í íslensku erfitt fyrir fólk sem talar arabísku, en þó misjafnlega erfitt. Fólk sem talar arabísku í Norður-Afríku þekkir til latneska stafrófsins sem fólk frá Mið-Austurlöndum gerir ekki, það þekkir bara arabíska letrið. Það fólk þarf því að læra tungumálið frá grunni, þar með talið stafrófið,“ segir Ahmed.