Mennta- og menningarmálaráðherra heimsótti námsver SÍMEY á Dalvík

Í námsverinu á Dalvík á Degi íslenskrar tungu. Frá vinstri: Hlynur Sigursveinsson sviðsstjóri fræðslu- og menningarsviðs Dalvíkurbyggðar, Kristín Björk Gunnarsdóttir verkefnastjóri hjá SÍMEY, Kristján Þór Júlíusson, mennta- og menningarmálaráðherra og Valgeir Blöndal Magnússon framkvæmdastjóri SÍMEY. Mynd: Mennta- og menningarmálaráðuneytið.

Kristján Þór Júlíusson mennta- og menningarmálamálaráðherra heimsótti námsver SÍMEY á Dalvík á Degi íslenskrar tungu og kynnti sér þá fjölbreyttu starfsemi sem þar fer fram.

Eins og fram hefur komið afhenti mennta- og menningarmálaráðherra Verðlaun Jónasar Hallgrímssonar á hátíðarsamkomu í Bergi á Dalvík á Degi íslenskrar tungu, 16. nóvember sl.

Í þessari heimsókn ráðherra í sinn gamla heimabæ kynnti hann sér menningar- og skólastofnanir í Dalvíkurbyggð og sótti m.a. heim námsver SÍMEY á jarðhæð Víkurrastar þar sem Tónlistarskólinn á Tröllaskaga er einnig til húsa.

Lengi hefur verið farsælt samstarf milli Dalvíkurbyggðar og SÍMEY um rekstur námsvers á Dalvík og með flutningi þess í nýtt húsnæði núna á haustdögum er það á margan hátt sýnilegra og aðgengilegra en áður. Dalvíkurbyggð leggur til húsnæði námsversins en SÍMEY annast starfsemina. 

Starfsemin á Dalvík er fjölbreytt. Nefna má raunfærnimat í sjávarútvegi, fisktækninám í samstarfi við Menntaskólann á Tröllaskaga og íslenskunám fyrir útlendinga, svo nokkur dæmi séu tekin.

Mennta- og menningarmálaráðherra þekkir bærilega vel til kennslu því hann kenndi á sínum tíma í stýrimannadeildinni á Dalvík og Dalvíkurskóla. Kristján Þór er menntaður stýrimaður og vann sem stýrimaður og skipstjóri áður en hann hellti sér í sveitarstjórnarstjórnmálin og síðar landsmálin. Einnig lærði hann íslensku og almennar bókmenntir í HÍ og stundaði þar sömuleiðis nám til kennsluréttinda.

Ráðherra er þökkuð heimsóknin í námsver SÍMEY á Dalvík.