Þjónustunámskeið fyrir ungt fólk

Flokkur: námskeið

Þetta er fyrsta námskeiðið af þessari tegund á Akureyri og er sérsniðið að einstaklingum sem eru að stíga sín fyrstu skref í þjóninum, ýmist í hlutastarfi eða í fullu starfi á veitingahúsum í sal. Á námskeiðinu er farið yfir grunnatriðin í að þjóna til borðs, tæknileg atriði, framkomu við gesti og samstarfsfólk, grunntök í framreiðslu og réttindi starfsmanna í faginu. Einnig verður farið yfir grunnþekkingu á áfengi, bæði á bjór og sterk- og léttvíni. Farið verður yfir alla þá þætti sem þjónar læra á svokölluðum prufuvöktum og meira til.

Leiðbeinandi er Ingibjörg Bergmann Bragadóttir, framreiðslumeistari en hún hefur unnið á veitingahúsum á Akureyri, í Reykjavík og erlendis í tíu ár. Á þeim tíma hefur hún lokið sveinsprófi og meistararéttindum í faginu og unnið á veitingahúsum sem vaktstjóri og veitingastjóri þar sem hún hefur öðlast töluverða reynslu í að taka á móti og þjálfa upp nýliða í faginu.

„Mér finnst alveg ótrúlega mikilvægt að ungt fólk að stíga sín fyrstu skref í þjóninum fái betri fræðslu áður en þau byrja að vinna sem þjónar. Þetta er erfitt starf og það er margt að læra á stuttum tíma. Hvort sem þú ert að mæta á þína fyrstu vakt eða fjórðu þá er þetta oft stressandi og yfirþyrmandi í fyrstu, af því að það gafst ekki tími til að kenna þér nógu vel. Á þessu námskeiði vil ég kenna allt það sem þú átt að læra á fyrstu vöktunum þínum á veitingahúsi þannig að þú getur mætt vel undirbúin/n á þínar fyrstu vaktir,“ segir Ingibjörg.

Námskeiðinu er skipt í eftirfarandi liði:

- Þjóninn 
Hvað þýðir að vinna sem þjónn? Í hverju felst starfið? Hvernig er að starfa sem þjónn?

- Inngangur að þjónustu: 
Almennt um veitingahús og þjónustu. Mismunandi kröfur eru gerðar eftir stöðum en grunnurinn er alltaf sá sami; að veita sem besta þjónustu.

- Álag í starfinu 
Farið yfir alla þá erfiðu þætti sem fylgja starfinu. Hvernig á að taka á móti kvörtunum, erfiðum vöktum, stressið sem fylgir því að byrja að vinna sem þjónn o.s.fv. 

- Grunntök í framreiðslu – Verklegi hlutinn: 
Að halda á bakka, taka þrjá diska, fara hægra megin við gestinn og margar fleiri grunnreglur sem allir þurfa að vita fyrir sína fyrstu vakt á veitingahúsi. 

- Matur og drykkur 
Það er einstaklega mikilvægt í öllu þjónustu- og sölustarfi að vita hvað maður er að selja. Auðvitað er ekki gerð krafa að ungir þjónar að stíga sín fyrstu skref í starfinu viti allt en grunnþekking er nauðsynleg og þá amk að vita hvert á að leita ef maður veit ekki svarið. Farið verður yfir framreiðslu matar, framreiðslu drykkja ofl. í stuttu máli.

- Réttindi þjóna 
Að lokum verður farið yfir réttindi í starfinu er varðar pásur á vaktinni, laun, yfirvinnu, útköll o.fl.

Félagsmenn í stéttarfélaginu Eining Iðja hjá ríki og sveitarfélögum athugið! 

Starfsmenntasjóðirnir Sveitamennt og Ríkismennt greiða námskeiðsgjald vegna þátttöku almennra starfsmanna sveitarfélaga og ríkisins. Þetta á einnig við stofnanir ríkis og sveitarfélaga sem eru aðilar að Sveitamennt og Ríkismennt.